Ukrayina prezidentiniñ Qırım Muhtar Cumhuriyetindeki temsilcisi Tamila Taşeva, Kшyivge kelgen ABD Kongressiniñ Temsilciler Palatasınıñ eki firqa eyyetinen körüşip, olarnı Ukrayinanıñ tamır halqlarınıñ işğal etilgen Qırımdaki vaziyeti ile tanıştırdı.
Taşeva eyyetke, Rusiyeniñ Ukrainağa istilâsı başlağan soñ, Qırımda tamır halqqa qarşı siyasiy davalar ve Rusiye mahkemeleriniñ qanunsız ükümleri arttı, taqip etilgen ve mahküm etilgenlerniñ çoqusı tamır halqlar temsilcileri ola, dep ayttı.
"Qayd ettim ki, maqsadımız — tek topraqlarnı degil, Qırımda işğalciler tarafından devamlı taqip ve repressiyalarğa oğrağan insanlarnı da azat etmektir. Yalıñız ukrayin Qırımında tamır halqlarnıñ, milliy azlıqlarnıñ vekilleri ve insan aqları temin etile ve kefil etile bile", — dep yazdı Taşeva Facebook saifesinde.
Daa evel haber etilgeni kibi, avgustnıñ 8-nde Kıyivge ABD Kongressiniñ Temsilciler Palatasınıñ eki firqa eyyeti keldi. Ukrayina prezidenti Volodımır Zelenskıy amerikalı qanun çıqarıcılarnen Ukrayinanıñ Rusiye tecavuzından qorçalavını ve barışıqnı muzakere etti.
Er yıl avgustnıñ 9-nda Dünya tamır halqlarınıñ halqara künü qayd etile. Ukrayina prezidenti Volodımır Zelenskıy 2021 senesi iyülniñ 21-nde Ukrayina tamır halqları aqqında No1616-IX qanunnı imzaladı, onı Yuqarı Rada 2021 senesi iyülniñ 1-nde qabul etti.
Qanun, Qırım yarımadasınıñ territoriyasında şekillengen Ukryaina tamır halqları olaraq qırımtatarlar, qaraylar, qırımçaqlarnı belgiley.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
