Ukrayina prezidentiniñ Qırım Muhtar Cumhuriyetindeki temsilciligi Rusiyeniñ Ukrayinağa istilâsı başlağanından berli Qırım yarımadasında defin etilgen Rusiye arbiyleriniñ malümatını yañarttı.
Müessisede bildirilgeni kibi, al-azırda Qırımda eñ azından 647 Rusiye ordusınıñ askeri defin etildi, olardan 490 Ukrayina vatandaşı ola bile.
''Rusiye ordusınıñ eñ azdan 647 askerini defin ettiler. 490-ı, ğaliba, Ukrayina vatandaşı edi. Cenazelerniñ sayısı daa çoq ola bile, çünki çoqusı aydınlatılmay", - dep aytıla Ukrayina prezidentiniñ Qırım Muhtar Cumhuriyetindeki temsilciliginiñ haberinde.
Keçken sene dekabr ayında müessise Ukrayinağa qarşı cenkte iştirak etken eñ az 605 Rusiye arbiyiniñ defin etilgeni aqqında haber etken edi.
Qırım.Aqiqat jurnalistleri Qırım ve Aqyarda elâk olğan 574 Rusiye arbiy adamınıñ şahsiyetini belgiley bildi. Rusiye tarafı ğayıplar aqqında malümatnı resmiy şekilde derc etmey.
Qırım ve Aqyarda Rusiyeniñ Ukrayinağa istilâsında elâk olğan Rusiye arbiylerini defin etmege devam eteler. Aqyarnıñ Rusiye yolbaşçısı Mihail Razvojayevniñ telegram kanalınıñ malümatına köre, 2022 senesi fevralniñ 24-nden itibaren Aqyarda eñ azından 100 Rusiye arbiyi defin etildi. Qırımda elâk olğan Rusiye arbiyleriniñ tam sayısını bildirmeyler. Bazı Rusiye arbiylerine hatıra tahtası açıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
