Ukrayina prezidentiniñ Qırım MC-deki temsilciligi Rusiye akimiyetiniñ işğal etilgen Qırım yarımadasında keçirgen yañı askerlikke celp etüv kampaniyasını takbih etti, dep haber ete müessiseniñ matbuat hızmeti.
"2022 senesi martnıñ 31-nde prezident (Rusiye –QA) Putin 18-27 yaş arası Rusiye vatandaşlarınıñ nevbettki baar çağırılması aqqında buyurıq imzaladı... İşğalciler Rusiyeniñ Ukrayinağa arbiy tecavuzınıñ yañı basamağında işğal etilgen Qırımdan vatandaşalrımıznı mecburiy celp ete... Rusiye memurlarınıñ bu areketleri arbiy cinayettir", - dep yazıla bildirmede.
Ukrayina prezidentiniñ Qırım MC temsilciligi, "RF-nıñ Qırımda qanunsız arbiy askerlikke celp etüv kampaniyası ve Ukrayina vatandaşlarınıñ askeriy hızmetten qaçınuv içün cinayet taqipi dünya toplulığı tarafından takbih etilgenini hatırlattı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
