Ukrayina Prezidentiniñ Qırım MC daimiy temsilcisi Tamila Taşeva "Ukrinform" ukrayin agentligine intervyü berir eken, yarımadanıñ işğalden azat etilmesinde soñ Qırımda saylavlarnıñ keçirilmesi bir sıra miyarnıñ yerine ketirilmesine bağlı olacağı aqqında aytıp bergen.
Onıñ sözlerine köre, işğalden azat etilüvden deral soñra Qırımda arbiy memuriyet çalışıp başlaycaq eken. Telükesizlik vaziyetiniñ turğunlaşuvından, ilk teşkervlerniñ keçirilüvinden, kollaborantlarnıñ yaqalanuvında soñ ise büyük ihtimalnen Qırımda arbiy ve grajdanlıq memuriyetke keçüv olacaq.
"Soñra biraz vaqıt keçken soñ saylavlar keçirilmeli. Bu sualni Merkeziy saylav komissiyası, Nazirler kabineti, Yuqarı Radanıñ temsilcileri, ekspertler ile muzakere etemiz. Saylavlarnıñ tarihı belli bir miyarlarnıñ yerine kitirilmesine ve bunıñ yapıla bilecegi allarınıñ yüz bermesine bağlı olacaq dep belleyim. Söz telükesizlikniñ temin etilmesi, kerek olsa minasızlaştıruv (çünki rusiyelilerniñ Qırımnı nasıl terk eteceklerini bilmeymiz), saylayıcılar siciliniñ azırlanması ve ilâhre aqqındadır", - dep qayd etti o.
Taşeva, Qırımda angi kategoriyalardan olğan vatandaşlarnıñ yaşağanını, ealiniñ qavmiy terkibiniñ ne olğanını añlamaq içün ealiniñ cedvelge aluvını keçirmek kerek olğanını qayd etti.
"Tamır qırımtatar halqına kelgende olarnıñ qoşma siyasiy aqları bar. Şunıñ içün Qırımda ne qadar tamır halqnıñ temsilcisiniñ yaşağanını añlamalımız. Devlet tarafından temsiliy organlarınıñ çalışmaları içün ayırılğan resurs buña bağlı olacaq, bu da artıq mevcut olğan qanunlarda közde tutula", - dep saya Taşeva.
Aprelniñ başında Ukrayina Nazirler kabineti Qırım ve Aqyar şeeriniñ İşğalden azat etilüvi ve reintegratsiyası Strategiyasınıñ yañı variantını qabul etti.
Yañı variantta Qırımnıñ işğalden azat etilmesi 2021 senesi tüşünilgeninden daa tez olacağı tahmin etile, dep qayd etti o.
Evel Milliy telükesizlik şurasınıñ kâtibi Oleksiy Danılov "Qırımnıñ işğalden azat etilmesi içün 12 adım" adlı yazını yayınlağan edi. Teklifler arasında "rus şerefi şeeri"niñ " "Obyekt № 6" olaraq yañıdan adlandırılması da bar.
Bundan ğayrı Danılov Qırımda "Rusiye arbiy gemisi siktir ket" abidesini tiklemege, 2014 senesinden soñ Qırımğa kelgen RF vatandaşlarını andan sürgün etmege ve Qırım köprüni sökmege teklif ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
