Qırım Kyivniñ kontroli altına nasıl qaytarılacaq kimse tam aytıp olamay. Bu aqta Ukrayına prezidentiniñ ofis yolbaşçısınıñ muavini İğor Jovkva Qırım.Aqiqatqa bergen intervyüsında ayttı.
«Bugünki künde bile Qırımnı işğalden azat etüvniñ farqlı yolları bar. İç bir yol red etilmey ve şimdi kimse 50 fayız bir doğrulıqnen bile Qırım işğalden nasıl qurtarılır aytıp olamaz, amma kesen-kes işğalden azat etilir», – dep ayttı Jovkva.
Onıñ qayd etkenine köre, Kyiv Qırımnı işğalden qurtarır dep aytmaq «istilâcığa yardım» olur edi.
«Biz diplomatik yolğa arbiy vastalar qoşula bile, dep ayta bilemiz. Qırımnıñ dünya toplulığınıñ kün tertibinde olması arbiylerimizge hususan onı işğalden azat etmek içün kerek olğan silânı almasına yardım ete, dep ayta bilemiz. Şunıñ içün mında (Qırımnı işğalden qurtarmaq içün – QA) bir çoq yol bar. Kene de istilâcığa yardım etmeymiz ve Ukrayınanıñ Qırımnı azat etüv strategiyası ve taktikasını aydınlatmaymız», – dep qoşı Jovkva.
ABD devlet kâtibiniñ muavini Viktoriya Nuladn Amerika Birleşken Devletleri Ukrayınanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
