Ukrayina prezidenti Volodımır Zelenskıy saban ayınıñ 13-nde musulman arbiyler, qırımtatar halqı Meclisiniñ vekilleri, diplomatlar ve din adamları ile beraber Iftarda iştirak etti. Bu tedbir, musulmanlar içün muqaddes Ramazan ayı devamında, Kıyivde Qırım musulmanları diniy idaresiniñ territoriyasında olıp keçti, dep bildire Qırımdaki Ukrayina prezidentiniñ Temsilciligi.
Devlet iftarı ananesi 2023 senesi Ukrayina prezidenti tarafından başlatıldı ve o vaqıttan berli resmiy seviyede keçirile. Tedbirni Ukrayina Prezidentiniñ Qırım Muhtar Cumhuriyetindeki temsilciligi ve Qırım musulmanları Diniy idaresi Kıyiv qırımtatar cemiyetiniñ desteginen teşkil ettiler.
İftarağa Prezident Ofisi reberiniñ muavini Olena Kovalska; Milliy telükesizlik ve mudafaa şurasınıñ kâtibi Oleksandr Lıtvınenko; Ukrayina Prezidentiniñ Qırım Muhtar Cumhuriyetindeki daimiy temsilcisi Ölğa Kurışko; Ukrayina Mudafaa nazirliginiñ Baş istihbarat idaresiniñ yolbaşçısı Kırıllo Budanov; Ukrayina halq deputatı Tamila Taşeva; qırımtatar halqınıñ lideri Mustafa Cemilev; qırımtatar halqı Meclisiniñ reisi Refat Çubarov; qırımtatar halqı Meclisiniñ reisiniñ birinci muavini Nariman Celâl; Qırım MC musulmanları diniy idaresiniñ müftisi, şeyh Ayder Rustamov; Ummam Ukrayina musulmanları diniy idaresiniñ müftisiniñ muavini Suleyman Hayrullahyev, Türkiye ticaret naziri İbragim Bolat, Azerbaycan, Mısır, İndoneziya, Qırğızistan, Libiya, Pakistan, Özbekistan, Türkiye, Tacikistan, Turkmenistan, Qatar, Aljir, İraq, Qazahistan ve Sudandan diplomatik missiyalarnı yolbaşçıları.
Tedbir vaqtında Zelenskıy ukrayin arbiy musulmanlarını III derece Boğdan Hmelnitskiy, III derece "Cesürlik içün", Danolo Ğalıtskıy nişanı ve "Ukrayinağa arbiy hızmet içün" medali ile taqdirledi.
Qırım musulmanları diniy idaresiniñ yolbaşçısı Ayder Rustemov bu künniñ orazası bitkenini bildirgen iftar namazını oqudı.
Devlet iftarı vaqtında Kıyivde Ukrayinada diniy mirasnıñ yoq etilmesi, din erbaplarına qarşı basqılar ve Rusiyeniñ istilâsına qarşılıq kösterüvde diniy cemiyetlerniñ rolüne bağışlanğan Al-İnsan sergisi taqdim etildi. Ekspozitsiyada musulman kapellanlarınıñ, hususan Hacimurad Putilin, Pavel Fedosov ve Rustem Asanovnıñ ikâyeleri taqdim etildi. Soñkisi rus esirligi ve işkencege oğradı, amma cemiyetiniñ yaşayış aqqı içün küreşmege devam ete.
Ekspozitsiyanıñ ayrı bir bölügi vaqtınca işğal etilgen topraqlarda diniy inşaatlarnıñ muntazam sürette yoq etilmesine ve Rusiye quvetçileriniñ qırımtatar musulman cemiyetini taqip etmesine bağışlana.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
