Ukrayina prezidenti ofisiniñ yolbaşçısı Andriy Yermak, İstanbulda keçirilgen körüşüvniñ neticesinde taraflar BMT-nıñ imayesi altında Ortaq koordinatsiya merkezini yaratmağa añlaşqanlarını bildirdi.
"O, İstanbulda yerleşecek. Onıñ vazifesi Qara deñizde telükesiz navigatsiyanıñ umumiy monitoringini ve koordinatsiyasını ömürge keçirmek olacaq", - dep yazdı o telegramda.
Yermak, Ukrayinanıñ agrar mahsulatınıñ ihracatınıñ ğayrıdan başlatılması meselesinde Ukrayinanıñ telükesizliginiñ prioritet olğanını qayd etti.
"Tam bu sebepten Ukrayina Qara deñizde navigatsiyanıñ işlemesi içün esas algoritm yaratmağa teklif etti. Bu ukrayin zahiresiniñ ihracatını temin etecek ve bütün dünyada millionlarnen insannıñ erzaq telükesizligini temin etecek", - dep qayd etti o.
Ukrayina ve Rusiyeniñ arbiy delegatsiyaları iyülniñ 13-nde İstanbulda aytışuvlar keçirdiler. Körüşüvde Türkiyeniñ arbiy memurları ve BMT temsilcileri iştirak etti. Aytışuvlar bir buçuq saat devam etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
