Ukrayinalı arbiyler Qırım ve Aqyarğa darbeler endirerek Qırım yarımadasınıñ işğalden azat etilmesine ilk azırlıq çerçivesinde bir sıra vazifeni ömürge keçireler, dep bildirdi Ukrayina prezidenti Ofisiniñ yolbaşçısınıñ mesleatçısı Mıhaylo Podolâk.
Onıñ sözlerine köre, vazifelerden biri Rusiyeniñ arbiy ve anbar infraterkibini faal şekilde yoq ete bilmek içün yarımadanıñ üzerinde semanıñ açılması kerekligidir. Bunıñ içün Ava mudafaası sistemalarını ve raketalarğa qarşı komplekslerni yoq etmek kerek.
Faal arbiy areketler bölgesine Rusiye resurslarınıñ ve yedekleriniñ toqtamadan teslim etilmesini de toqtatmaq kerek.
"Bunıñ içün ruslarnıñ naqliyat logistikası ve Keriç köprü kibi qanunsız obyektleri yoq etile", - dep yazdı Podolâk.
Daa bir vazife "Qırımnıñ territorial suvlarından RF Qara deñiz flotunıñ qalımtılarını yoq etmek ve Qara deñizniñ tış yurisdiktsiya deñizi statusını qaytarmaq". Bunı yapmaq içün "Rusiyeniñ arbiy gemileri yoq etile".
Sentâbrniñ 14-ne keçken gece Kezlev yanında Ukrayina telükesizlik hızmeti ve Ukrayina arbiy deñiz quvetleri mahsus operatsiyanı keçirip, «Triumf» Rusiye ava mudafaa kompleksini yoq etti, dep bildirdi Azatlıq Radiosına Ukrayına telükesizlik hızmetindeki menbalar.
Sentâbrniñ 14-nde saba Kezlev, Zaozernoye ve Uyutnoye sakinleri küçlü patlavlar aqqında bildire. saat 5:13-te Rusiye akimiyeti Keriç köpründe areketni qapattı.
Rusiye Mudafaa nazirligi Rusiye ava mudafaası Qırımda uçaq çeşitli 11 uçucısıznı urıp tüşürdi, dep bildirdi. Ücüm tafsilâtları aydınlatılmay. Rusiye arbiyleri Ukrayınanı qabaatlay, Ukrayına akimiyeti şimdilik bir izaat bermedi. Bu malümatnı mustaqil menbalardan tasdıqlamaq imkânsız ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
