Ukrayina prezidenti ofisinde Rusiye işğal etken Qırımnıñ Canköy rayonında sabaa saatlarında yüz bergen patlavlarnı izaatladılar.
"Canköy yaqınlarında saba patlav seslerinden başlandı. Daa bir kere hatırlatam ki, normal bir memleketniñ Qırımı Qara deñiz, dağlar, raatlıq, turizm aqqıdadır. Rusiye tarafından işğal etilgen Qırım ise anbarlarnıñ patlaması ve işğalciler ve qırsızlar içün ölüm telükesiniñ artması aqqındadır. Arbiysizleştirüv arekette", - dep yazdı Twitterde Ukrayina prezidenti ofisiniñ reis mesleatçısı Mıhaylo Podolâk.
Avgustnıñ 16-sında saba saatlarında işğal etilgen Qırımnıñ Canköy rayonında patlav sesleri eşitilgen. Yerli telegram kanalları Canköy rayonıñ Haklay köyünde elektrik stantsiyası yanğanını haber ettiler. Aynı zamanda "Krımskiy Veter" telegram kanalı "anda arbiy yedekler anbarından detonatsiya" olğanını bildire. Arbiy yedekler anbarından patlavlar aqqında malümatnı Qırımtatar Milliy Meclis reisi Refat Çubarov tasdıqladı.
Biraz soñra işğal etilgen Qırımnıñ Canköy rayonındaki Haklay qasabasınıñ Rusiye memuriyeti patlavlarnıñ sebebi arbiy yedeklerniñ detonatsiyası olğanını bildirdi.
Rusiye Mudafaa nazirligi Qırımnıñ Canköy rayonındaki Haklay qasabasında arbiy yedekler anbarında yanğın çıqqanını bildirdi.
Qırımnıñ Rusiye akimiyeti Canköy rayonınıñ Haklay (Mayskoye) qasabasından 2000-ge yaqın adam tahliye etilgenini bilidrdiler. Qırımnıñ Rusiye yolbaşçısı Sergey Aksönov arbiy yedekler anbarında yüz bergen detonatsiya neticesinde eki adam zar körgenini haber etti.
Haklay köyü Canköyden 25 km cenüp-şarqtadır, köyden Kerçke ketken demiryol hattısı keçe ve anda Qalay stantsiyası yerleşe.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
