Ukrayina Baş tahqiqat idaresiniñ temsilcisi Sergey Panteleyev Kıyiv civarındaki İrpinde 269 tınç sakin öldürildgenini haber etti. Onıñ sözlerine köre, polis hadimleri şeerde tahqiqat tedbirlerini tamamlağan ve insanlarnıñ atıp öldürilmesiniñ 7 yerini belgilegen.
Pantleyev, tahqiqatçılar Rusiye işğalcileriniñ yerleşken rayondaki mesken maallelerni, hususiy evlerni ve tükânlarnı baqıp çıqqanlarını haber etti.
Bundan ğayrı, Panteleyevniñ sözlerine köre, Ukrayina polisi Rusiye ordusı tarafından Rich Town yaşayış kompleksini ateşke tutması ile bağlı dava materiallarını Halqara cinayet mahkemesine bermek içün azırlağan.
Rusiye ordusı İrpinge fevralniñ soñunda kirdi. Bundan soñ anda faal arbiy areketleri başlandı. Şeerde tınç sakinlerniñ de oğrağan ateşke tutmalar aqqında haberler kelip başladı. Martnıñ soñunda Rusiye işğalcileri İrpinden keri çekildiler.
Şeer başlıqlarınıñ malümatına köre, İrpinde evlerniñ 70 faizi, şu cümleden tasil müessiseleri ve hastahaneler berbat etilgen.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
