Ukrayına ordusı Robotıne köyüne kirip, yerli sakinlerni tahliye etti, dep bildirdi Ukrayına mudafaa naziriniñ muavini Ğanna Malâr.
«47-nci brigadanıñ askerleri Robotıne köyüne uruşıp kirdi, yerli sakinlerniñ tahliyesini teşkil etti. Askerlerimiz işini yapıp, duşmannı yoq ete. Rusiyeliler ise Robotınege toqtamayıp ateş aça», – dep yazdı o, Telegramda.
Malâr uruşlar devam ete, dep qayd etti.
Ukrayına Silâlı quvetleriniñ Baş ştabı bildirgenine köre, Robotıne tarafında Ukrayına askerleri «muvafaqiyetli olıp, irişken yerlerde qala, duşmannıñ yerlerine ateş aça».
Amerika Cenkni tedqiq etüv institutı (ISW) talilcileriniñ malümatına köre, Ukrayına ordusı Zaporijjâ vilâyetiniñ Robotıne köyünde ve onıñ şarqında avgustnıñ 20-21-nde «taktik ceetten pek muvafaqiyetli oldı».
Ukrayına mudafaa nazirligi Zaporijjâ vilâyetinde – Robotıne ve Mala Tokmaçka civarlarında Ukrayına arbiyleriniñ muvafaqiyeti aqqında bildirdi. Ukrayına mudafaa naziriniñ muavini Ğanna Malâr bildirgenine köre, «planlaştırılğan uruş devam ete».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
