Ukrayina Silâlı quvetleriniñ Baş ştabı Rusiyeniñ eñ büyük cermay istisal zavodlarından biri olğan Volgograd neft istisal zavodınıñ yoq etilmesini tasdıqladı.
Ukrayina Silâlı quvetleriniñ Baş ştabınıñ matbuat merkezi bildire ki, Boşnıñ 13-ne keçer gecesi Ukrayina mudafaa quvetleriniñ bölükleri yılda tahminen 15 million tonna neft çıqarğan "Lukoyl-Volgogradnefteperesoratı" cermay zavodına ücüm etti.
Ukrayina Silâlı quvetleri Baş ştabınıñ malümatına köre, AVT-1, AVT-3, AVT-5, AVT-6 ilk cermay işleme qurulışları, gidro temizleme qurulışları, suv taşuv-tüşürüv estakadası ve 2000 metr kub 6 suv anbarı zarar kördi.
Ukrayina arbiyleri añlata ki, böyle zavodnıñ er saatlıq toqtatıluvı — tank ve yük maşnaları içün daa az dizel yaqarlığı, uçaqlar içün daa az ava kerosini ve tecavuzcı raketa, "Şahed" ve patlayıcı maddelerni istisal etmek içün daa az cermay rublesi demektir.
Boşnıñ 13-ne keçer gecesi Ukrayin pilotsız uçaqları Rusiyeniñ Volgograd şeerine ücüm etti. Region gubernatorı Andrey Boçarov, uçucısızlarnıñ urulması neticesinde Volgogradnıñ cenübiy sanayı zonasında ve onıñ civarındaki territoriyada lokal yanğınlar qayd etildi, dep bildirdi.
Boçarovnıñ aytqanına köre, ücüm neticesinde dört işçi elâk oldı, daa ekisi hastahanege alındı.
Astra rusiye telegram kanalınıñ bildirgenine köre, uçucısız uçaqlar "Lukoyl" şirketiniñ Volgograd cermay zavodına ücüm etti. Bu Rusiyeniñ eñ büyük cermay zavodlarından biridir. Anda yanğın çıqtı. Şaatlarnıñ fotoresimlerinde birden bir qaç yanğın noqtası körüne.
Ukrayinanıñ "Exilenova+" ve "Supernova+" nezaret leyhaları haber etkenine köre, cermay zavodına ücüm etilgen soñ şeerde benzin stansiyalarında nevbetler peyda oldı.