Ukrayina Silâlı Quvetleriniñ Ava quvetleri bir künde 9 Rusiye uçağı yoq etilgenini bildirdi. Bunıñ aqqında Ukrayina Silâlı Quvetleriniñ Ava quvetleriniñ komandanlığı Facebookta haber etti.
"Saq! İşğalcilerniñ doquz uçağı yoq etilgen", dep yazıla bildirmede. Aynı zamanda ukrayin arbiyleri bu uçaqlarnıñ keçenlerde Qırımnıñ Saq rayonınıñ Novofedorovka qasabasında yüz bergen büyük patlavlar neticesinde yoq etilip etilmegenini bildirmediler.
Avgustnıñ 10-nda saba saatlarında olğan malümatqa köre, Ukrayina Silâlı Quvetleriniñ malümatına köre, Rusiye Ukrayinağa qarşı cenkte 232 uçaq ve 193 helikopter ğayıp etken. Keçenlerde Rusiye arbiyleri "uçaq alanında yüz bergen patlavlardan soñ iç bir kimse ve aviatsiya tehnikası zarar körmegenini" bildirdiler.
Al-azırda Ukrayina Silâlı Quvetleri Novofedorovka qasabasındaki uçaq alanında yüz bergen patlavlarğa alâqası olğanını tasdıqlamadı.
Avgustnıñ 9-nda Qırım ve Rusiye kütleviy haber vastaları, telegram kanalları Novofedirivka qasabasında (Saq) uçaq alanında patlavlar oldı, dep bildirdi.
Qırımnıñ Rusiye yolbaşçısı Sergey Aksenov adise yerine bardı. Rusiye akimiyeti «yaqın evlerden» 30 insan tahliye etildi, dep bildirdi. Umumiy tahliye olmadı.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına Mudafaa nazirligi Novofedirivka qasabasındaki Rusiye arbiy aerodromında patlavlarnı izaatlap, müessise «yanğın sebeplerini bilmey», dep qayd etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
