Ukrayina Yuqarı Radasınıñ insan aqları vekâletlisi Dmıtro Lubinets Türkiye ombudsmeni Şeref Malkoç ile körüşkende, oña 2014 senesinden berli Rusiye akimiyeti tarafından Qırımda tutulğan 216 Ukrayina vatandaşınıñ cedvelini berdi. Bu aqta martnıñ 26-nda "Ukrinform" mühbiri haber etti.
Lubinetsniñ qayd etkenine köre, 2014 senesinden başlap Ukrayina Rusiye Federatsiyası ve Qırım territoriyasından qanunsız tutulğan bütün ukrayinalılarnı qaytaruv meselesini daima kötergen edi.
"Yazıq ki, tek Rusiye Federatsiyasınıñ mevamı sebebinden er kesni evge qaytarıp olamadıq, ve 2014 senesinden berli rusiyeliler tarafından apiske alınğan vatandaşlarımıznıñ ayrı cedvelleri alâ daa bar. Olar em cenk esirleri, em de vatandaşlardır. Bu büyük cedveller. Siyasiy mabüsler kategoriyası bar, Qırımda tutulğanlar - 216 Ukrayina vatandaşı. Ve bugün bu cedvelni Malkoç beyge (Türkiye ombudsmenine - QA) berdim", - dep bildirdi Lubinets.
Qırımtatar resurs merkezi bildirgenine köre, bugünki künde azatlıqtan marum etilgen 194 qırımlı siyasiy mabüs qayd etildi, olardan 134 qırımtatardır.
Ukrayina Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-na qadar Rusiyede 208 qırımlı siyasiy mabüs tutula, olardan 125 - qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
