Onıñ malümatına köre, Nariman Celâl ve Aziz Ahtemov Şarqiy Sibirge, Asan Ahtemov ise Vladimirge etap etile.
"Nariman Celâlnıñ bulunğan yeri, sağlıq vaziyeti aqqında bir şey belli degil, çünki bir qaç aftadan berli onen bağ yoq", - dep bildirdi ombudsman.
O, Ukrayina vatandaşlarınıñ Rusiye territoriyasına etap etilmesini Jeneva şartnamesiniñ ve halqara uquq qaideleriniñ bozulması dep adlandırdı. Çünki olarğa köre, işğalci devletke vatandaşlarnı öz topraqlarına köçürmek yasaqtır.
Lubinets dünya toplulığını Rusiyeniñ halqara uquq qaidelerini bozmasına "qatiy cevap bermege" ve qanunsız sürette apis etilgen ukrayinalı siyasiy mabsülerniñ episini azat etmesini talap etmege çağırdı.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
