Ukrayina Tış işler nazirligi işğal etilgen Qırımda qırımtatar qadınlarında keçirilgen tintüv ve tutuvlarnı takbih etip, olarnı halqqa qarşı repressiyalar dep adlandırdı. Bu beyanat Ukrayina Tış işler nazirliginiñ saytında derc etildi.
Laf oktâbrniñ 15-nde olğan adise aqqında kete, Rusiye uquq qoruyıcıları yarımadanıñ bir qaç rayonında qırımtatarlarnıñ evlerinde kütleviy tintüvler keçirip, bir qaç qadınnı tuttı.
Tutulğanlar arasında – Esma Nimetulayeva, Nasibe Saidova, Elvira Aliyeva, Eleonora Osmanova ve Fevziye Osmanova.
«Propagandacı media «dünya halifeligi ğayesini teşviq etken qadın bölügi» aqqında uydurılğan qabaatlavlarnı tarqatıp, repressiyalarnı aqlamağa ve barışıqsever qadınlarnı – ana, oca ve studentlerni – «terrorist» olaraq köstermege tırışa. Böyle areketler Moskvanıñ qırımtatar halqına qarşı muntazam ücüminiñ bir qısmı ola, milliy kimligini, maneviyligini ve öz topraq aqqını yoq ete», – dep bildire Ukrayina Tış işler nazirligi.
Diplomatik müessiseniñ malümatına köre, bu taqipler halqara gumanitar uquq normalarını sert bir şekilde boza, hususan Dördünci Jeneva şartnamesini ve esas insas aqlarını.
Ukrayina Tış işler nazirligi halqara toplulıq, aq qorçalayıcı teşkilâtlar ve medianı bu adiselerge diqqat ayırıp, Esma Nimetulayeva, Nasibe Saidova, Elvira Aliyeva, Eleonora Osmanova ve Fevziye Osmanovanıñ ve qanunsız tutulğan er kesni acele azat etilmesini talap etmege çağıra.
Qırımlı advokat Emil Kurbedinovnıñ malümatına köre, tutulğan dört qırımlı qadın – Esma Nimetulayeva, Nasibe Saidova, Elvira Aliyeva ve Fevziyev Osmanova – Rusiye Federatsiyası Ceza kodeksiniñ 205.5 maddesiniñ 1-inci qısmına istinaden (terror teşkilâtınıñ faaliyetini teşkil etüv ve faaliyetinde iştirak etüv) qabaatlana. O, 20 yılğa qadar apis cezasınıñ berilüvini belgiley.
Qırımnıñ FSB yolbaşçılığı tutulğan qırımlılar «Rusiyede yasaqlanğan ve dünya halifeligi mefküresini tarqatqan halqara terror teşkilâtınıñ gizli qadın bölüginiñ» iştirakçileri edi, dep bildirdi. Tahqiqat versiyasına köre, qırımlı musulman qadınlar «gizli toplaşuvlar keçirip, yañı tarafdarlarını celp etti».
