Ukrayina Nazirler kabineti Qırımda 22 coğrafiy obyektniñ adını deñiştirdi, olarnıñ bir qısmı tarihiy qırımtatar adlarını aldı. Bu aqta Ukrayina prezidentiniñ Qırım Muhtar Cumhuriyetindeki temsilciligi Nazirler Kabinetiniñ 2025 senesi yanvar 17-de çıqqan 49 nomeralı "Bazı coğrafik obyektlerniñ adlarını deñiştirüv aqqında" buyruğına atıf etip haber ete.
"Temsilcilik Ukrayina milliy hatıra institutı ve Qırımtatar Milliy Meclisi ile beraberlikte, meraqlanğan taraflarnı celp etip, iş mesleatlarında iştirak etüv, qanun talaplarına uyğun olaraq adlarını deñiştirmekni teklif etilgen obyektlerniñ cedvelini keliştirüv ve qoşma kommunikatsiyalar keçirüv yolunen qarar leyhası üzerinde çalışmağa faal sürette qoşuldı", — dep aytıla haberde.
"Müstemlekeleştirüvsiz, şu cümleden toponimikanı müstemlekeleştirüvsiz, ukrayin hatıra siyasetiniñ müim qısmı ola, Qırımğa tarihiy adlarnıñ qaytarılması ise Ukrayinanıñ tamır halqlarınıñ aqlarını teminlevinen doğrudan bağlı", — dep qoştılar müessisede.
Ukrayina prezidentiniñ Qırım Muhtar Cumhuriyetindeki sabıq temsilcisi Tamila Taşeva, ükümet Qırımnıñ toponimik adlarını deñiştirmege imkân berecek qarar üzerinde çalışqanını bildirdi.
Bundan evel Qırımtatar Milliy Meclisiniñ reisi Refat Çubarov işğal etilgen Aqyarğa Aqyar adını qaytarmaqnı teklif etti .
Ukrayina milliy havfsızlıq ve mudafaa şurasınıñ sabıq kâtibi Oleksiy Danılov Qırımnı işğalden qurtaruvnıñ 12 adımı adlı yazını derc etken edi. Teklifler arasında "Rus şan-şüreti şeerleri"niñ adını "obyekt 6" olaraq deñiştirmek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
