Ukrayina Nazirler kabineti qırımtatar halqı Meclisiniñ tamır halqınıñ temsiliy organı olaraq uquqiy statusınıñ pekitilmesi aqqında qararnıñ qabul etilmesini soza, dep bildirdi Qırım.Aqiqatqa bergen intervyüsında Meclis reisi Refat Çubarov.
''Çoqusı allarda semereli çezüvler qıdıruvında, ve bazıda endi qabul etilgen qanunlarnı amelge keçirüvde, bizler ciddiy añlaşılmamazlıqnen qarşılaşamız, atta qarşılıqnen aytsaq olur... Bizim içün eñ müim mesele - Ukrayina Nazirler Kabinetiniñ Ukrayina tamır halqları aqqında qanunınıñ 8-inci maddesini yerine ketirmekten vazgeçüvi, oña köre qırımtatar halqı Meclisiniñ tamır halqınıñ temsil organı olaraq uquqiy statusını pekitmek qararını çoqtan qabul etmek kerek edi'', - dep qayd etti o.
Çubarov, Meclisniñ Ukrayina milliy hatıra institutınen "Ukrayinada Rusiye imperatorlıq siyasetini takbih etüv ve teşviqatını yasaq etüv ve toponimikanıñ dekolonizatsiyası aqqında" qanunnıñ amelge keçirilmesine dair fikir farqlılığı aqqında da ayttı.
Meclis 2023 senesi iyün ayında temsiliy organnıñ uquqiy statusını pekitmek içün vesiqalarnı Ukrayina Etnopolitika ve Vicdan serbestligi devlet hızmetine berdi.
Meclis 1991 senesinden başlap qırımtatarlarnıñ temsiliy organı ola. Ukrayina qanunları böyle de-yure statusnı resmiyleştirmege imkân bermey edi. Amma 1999 senesi Leonid Kuçma Ukrayina prezidenti yanında yalıñız Milliy Meclis azalarından ibaret olğan Qırımtatar halqı vekilleriniñ Şurasını meydanğa ketirdi.
Ukryainada resmiy uquqiy statusı olmağan Meclis bir çoq halqara teşkilâtlarnıñ vesiqalarında, şu cümleden BM Baş Assambleyası ya da OSCE kibi halqara teşkilâtlarda qırımtatarlarnıñ temsiliy organı olaraq qayd etile.
Meclisniñ faaliyeti Ukrayina Devlet büdjeti esabından ayrı büdjet programması boyunca temin etilecek. Temsil organı çetel devletlerden, halqara teşkilâtlardan, uquqiy ve hususiy şahıslardan maliyeviy, tehnikiy, hayriye ve gumanitar yardımnı da ala bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
