Ukrayina muzakere taqımı bu afta ABDni ziyaret etecek, dep bildirdi Ukrayina prezidenti Volodımır Zelenskıy.
"Şübhesiz, muzakerege diqqat ayırmağa ister edik, çünki, bizim fikirimizce, ABD sanktsion ve diger adımlarnen, maddiy yardımnen, Ukrayina içün ayrı ava mudafaa yardımınen dereceni arttırmalı, ve böyle adımlarnen Putinge kösterip, muzakere masasına oturmağa mecbur etmek kerek", – dedi o, jurnalistlerge Prılukı şeerinde.
Ukrayina prezidenti Volodımır Zelenskıy Büyük Britaniya Tış işler naziri Edward Milibandnen beraber oktâbrniñ 8-nde Prılukı şeerini ziyaret etip, Rusiye raketa ücümi neticesinde elâk olğanlarnı añdı.
Oktâbrniñ 7-nde Rusiye quvetleri Çerniğiv vilâyetiniñ Prılukı şeerine raketa darbesini endirdi. Vilâyetniñ arbiy memuriyet yolbaşçısı malümatına köre, darbelerden biri çoq qatlı evge yapıldı.
Rusiye darbesi neticesinde, resmiy malümatqa köre, 22 insan elâk oldı, beşi bala. 54 kişi yaralandı, yedisi – bala.
Ukrayina ateş toqtatıluvınıñ bir qaç rejimine azır, dep bildire. Laf ateşniñ bütünley ve şartsız toqtatıluvı, Türkiye ve Mısır aracılığınen Qara deñizde barışıq, İndistan aracılığınen aşayt barışığı ve ABD aracılığınen energetika barışığı aqqında kete.
Rusiye ateşni toqtatmağa azır olğanını aytmay. ABDniñ Rusiyeniñ Ukrayinağa qarşı cenkini toqtatacaq barışıq muzakerelerini yañıdan başlatmaq ıntıluvlarına baqıp Cenkni tedqiq etüv institutı Kreml Rusiyeniñ Ukrayinağa qarşı cenkni toqtatuv barışıq muzakerelerinde bir de bir uzlaşuvğa razı olmağa istemegenini tekrarladı.
Oktâbrniñ 1-nde Moskva civarındaki "Valday" munaqaşa klubında çıqışta bulunğan Rusiye lideri Vladimir Putin energetika infrastrukturası ve vatandaş gemilerine qarşı eki taraflı darbelerni toqtatuv teklifini resmiy şekilde red etip, bu teşebbüsni "manasız" dep adlandırdı. Putinniñ aytqanına köre, ABD aracılığınen muzakere etilgen "energetika barışığı" Moskva menfaatlarını qarşılamay.