Armannıñ 25-nde aqşam ve 26-na keçer gecesi Ukrayina mudafaa quvetleri Qırımda bir sıra arbiy obyektke ücüm etti, dep bildirdi Ukrayina mudafaa quvetleriniñ Baş ştabı.
Berilgen malümatqa köre, Qaçi civarındaki "Kasta" radar stansiyası, Novoivanovkadaki maddiy-tehnikiy vastalar anbarı ve Qırımnıñ ğarbındaki Aqmeçitte "Geran"/"Gerbera" pilotsız uçaqları içün retranslâtorğa ücüm etildi.
Teşkilâtta tasdıqlamalar berilmedi, cenk şaraitlerinde bu malümatnı mustaqil olaraq teşkermek qıyın.
Rusiye arbiyleri Ukrayina Silâlı quvetleri Baş ştabınıñ beyanatlarına izaat bermedi, öz zararları aqqında da haber etmedi, tek Armannıñ 26-na keçer gecesi Rusiye Federatsiyasınıñ 15 bölgesi ve ilhaq etilgen Qırım üzerinde 426 dron urulğanı aqqında bildirdi. Ne qadar dron tüşürilgenini nazirlik aydınlatmadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.