İlk küzniñ 16-na keçer gecesi Rusiye arbiyleri Ukrayinanıñ territoriyasına Rusiyedeki üç yöñelişten ve işğal etilgen Qırımnıñ Sarabuz qasabasından ve Çauda burnundan 80 dronnen ücüm etti, dep bildirdi Ukrayina Silâlı Quvetleriniñ Arbiy-ava quvetleri.
"İlk malümatqa köre, saat 08:00-ge qadar ava mudafaası 63 duşman dronunı urıp tüşürdi ya da bastırdı. Yedi yerde duşmannıñ ava ücüm vastalarınıñ urulması qayd etildi ve eki yerde urulğanlarnıñ (yıqılğan parçalarnıñ) tüşmesi qayd etildi", — denile beyanatta.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.