Qırımda RF arbiyleriniñ üç radiolokatsiya kompleksi yoq etildi, dep bildire Ukrayina Mudafaa nazirliginiñ Baş istihbarat idaresi öz telegram kanalında.
"2024 senesi noyabrniñ 29-nda Ukrayina Mudafaa nazirliginiñ GUR operatsiyası neticesinde vaqtınca işğal etilgen Qırımda Rusiyeniñ paalı radiolokatsiya komplekslerine muvafaqiyetli darbeler endirildi", — dep haber ete müessise.
Beyanatqa köre, ukrayin istihbaratı bir "Kasta-2e2" ve eki "Podlöt" radarlarını urıp olğan. Mudafaa nazirliginiñ matbuat hızmeti bu tehnikanıñ yoq etilüvi aqqında tafsilâtlı malümat bermedi. Rusiye arbiyleri bu beyanatlarnı izaatlamadı. Ukrayina istihbaratınıñ bildirüvlerini alternativ menbalar yardımınen tasdıqlamaq şimdilik mümkün degil.
Noyabrniñ 28-nde Ukrayina Mudafaa nazirliginiñ Baş istihbarat idaresi, noyabrniñ 28-nde işğal etilgen Qırımda "Podlöt" Rusiye radar kompleksi yoq etilgenini bildirgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı "Ukrayina uçucısızlarına" qarşı ateş ve "ava mudafaa sistemasınıñ işi" dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün "esas telüke" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
