Ukrayına Mudafaa naziri Rustem Umerov Rusiye Federatsiyası Qara deñiz flotu komandanınıñ likvidatsiyasını izaatladı.
«İlk evelâ, o, vaqtınca işğal etilgen topraqlarımızda buluna. O, mında olmamalı. Şunıñ içün ölgen olsa, er kes içün yahşı bir haber, topraqlarımıznıñ işğalden qurtarıluvını devam ettiremiz», – dep qayd etti o, CNN yayınında.
Ukrayına Mahsus operatsiyalar Quvetleriniñ komandanlığı Rusiye Qara deñiz flotuna qarşı endirilgen darbe neticesinde 34 Rusiye arbiyi elâk oldı, flot komandanı da bar. «Daa 105 işğalci yaralandı. Ştab binası tamir etilmeycek alda», – dep aytıla haberde.
Rusiye mediası sentâbrniñ 22-nde Aqyarda ştabqa qarşı ücüm sebebinden Rusiye Qara deñiz flotunıñ komandanı Viktor Sokolov elâk ola bile, dep bildirgen edi. Resmiy şekilde ölümi aqqında haber etilmedi.
Aynı vaqıtta Rusiye Mudafaa nazirligi kollegiya toplaşuvından video derc etti, anda Rusiye Qara deñiz flotunıñ komandanı Viktor Sokolov bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
