Ukrayina Mudafaa nazirliginiñ Baş istihbarat idaresiniñ bildirgeni kibi, 17 ukrayin Rusiye esirliginden azat etilgen, olardan 16-sı arbiydir.
"Bugün Arbiy esirler ile muamele üzre koordinatsion ştabı 15-ke 17 formulasına esasen nevbetteki deñişüvni keçirdi. Evine 16 ukrayin arbiyi qayta, olaradan 2 zabit ve 14 asker. Bir de vatandaş azat etildi", - dep yazıla bildirmede.
Berilgen malümatqa köre, azat etilgen 5 kişi ağır yaralı ve olarnıñ acele tedaviylevge ihtiyacı bar.
İyünniñ 18-nde Baş istihbarat idaresi deñişüv vaqtında 5 silâsız ukrayin azat etilgeni bildirgen edi. Bunda bir kün evel ise esirden göñülli ve paramedik Yuliya Payevskaya azat etilgen edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
