Ukrayin deñiz dronlarınınıñ ücümi neticesinde Qırımda 1176 "Akula" ve 11770 "Serna" leyhalarına ait olğan RF Qara deñiz flotunıñ eki kiçik desant kateri yoq etildi. Bunı Ukrayina MN Baş istihbarat idaresiniñ matbuat hızmeti haber etti.
"2023 senesi noyabrniñ 10-nda vaqtınca işğal etilgen Qırım topraqlarındaki Uzkaya körfezi bölgesinde keçirilgen qoşma keşfiyatnıñ neticeleri suvastı ücüm dronlarınıñ ücümi neticesinde RF Qara deñiz flotunıñ kiçik desant katerleri yoq etilgenini köstere. Elde etilgen yañı keşfiyat malmüatına köre, işğalcilerniñ eki kateri zarar körgen: olardan biri 1176 "Akula" qadimiy leyhanıñ gemisi, digeri 11770 "Serna leyhasınıñ gemisi", - dep yazıla bildirmede.
Haber etilgenine köre, 1176 "Akula" leyhasına ait olğan kater birden yoq etilgen, 11770 "Serna" leyhasına ait olğan kater ise biraz soñra batqan.
Rusiye Mudafaa nazirligi gemilerniñ yoq etilmesi aqqında haber etmedi. Muarririyet bu malümatnı teşkermege tırışa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
