«Ukrayınanıñ tamır halqlarından biri olğan qırımtatar medeniyeti – zemanede inkişaf etken canlı miras. Bu tek merasim ve adetler aqqında degil, münderice ve qıymetler aqqında», – dep aytıla haberde.
Qayd etilgenine köre, 2021 senesi UNESCO qırımtatar «Örnegini» İnsanlıqnıñ maddiy olmağan medeniy miras reprezentativ cedveline kirsetti.
«Milliy bank Ukrayınanıñ maneviy medeniy mirasınıñ çeşitlerinden, qırımtatar mirasınıñ tekrarlanmazlığınen ğururlana. Qırımnıñ tamır halqına teren ürmet kösterilüvi olaraq ve Ukrayınanıñ UNESCOda 70 yılı munasebetinen qırımtatar milliy kimliginiñ bir qısmı olğan unikal örnekke bağışlanğan pullarnı taqdim etemiz. Bu pullar Qırımnıñ işğalden azat etilüvini ve qırımtatar halqınıñ serbest yaşayışını vatanı – Ukrayına Qırımında ğayrıdan tiklengenini köstergen belli bir amayıl olacaq», – dep ayttı Ukrayına Milliy bankınıñ yolbaşçı muavini Oleksiy Şaban.
Pullarnıñ ög tarafında qırımtatar nağışçısı, kergef başında çalışqan ustanıñ sıması bar. Nağışçınıñ er tarafında ananelerniñ devamlılığını köstergen örnek dalları aça.
Tersinde ise qoranta qıymetlerini köstergen örnek bar. Ortasında aile bağlarınıñ timsallerini aks etken unsular bar. Bu qoranta erkek, qadın ve bir ev timsallerinden ibaret. Eki tarafta da bala timsalleri bar. Episi olar qoranta birligi ve amanlığını aks etken bir örnekni şekillendire.
Hatıra pullarınıñ taslaq müellifi «Alem» cemaat teşkilâtınıñ reisi Esma Aciyeva oldı, dizaynını Oleksandra Kuçinska keliştirdi.
10 ğrivnâlıq «Qırımtatar örnegi» kümüş hatıra pulları 7500 dane tirajında çıqarılacaq, 5 ğrivnâlıq – 75000 qadar (suvenir qutusında). Olarnı Ukrayına Milliy bankınıñ numizmatika internet tükânında ve tarqatıcı banklarında satacaqlar.
Mayısnıñ 16-nde «Ukrpoşta» Kyivde qırımtatar nağışlı markanı taqdim etti.
Fevral ayına qırımtatar medeniyetiniñ eki elementi Ukrayına tamır halqlarınıñ maneviy medeniy mirası olaraq tanıldı. Laf «qırımtatarlarnıñ qave ananesi» ve «Ağır Ava ve Haytarma» ananeviy qırımtatar oyunı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
