Ukrayına Silâlı quvetleriniñ Baş ştabı oktâbrniñ 26-nda saba cebedeki vaziyetni aydınlattı. Berilgen malümatqa köre, keçken künü 78 cenk çatışması oldı.
«Kupânsk yönelişinde Ukrayına askerleri Harkiv vilâyetiniñ Sınkivka, Petropavlivka, İvanivka mesken yerleri rayonlarında duşmannıñ 13 ücümini keri qaytardı. Liman yönelişinde askerlerimiz mudafaa qoruy, Lugansk vilâyetiniñ Nadejda ve Makeyevkada duşmannıñ bütün ücümlerini keri qaytardı. Bahmut yönelişinde Ukrayına askerleri Donetsk vilâyetiniñ Boğdanivka, İvanivka, Kleşçiyevka, Andriyıvka rayonlarında duşmannıñ 10 ücümini keri qaytardı. Ukrayına Silâlı quvetleri Donetsk vilâyetiniñ Bahmut şeerinden cenüpte ücüm areketlerini devam ettire, duşmannıñ asker ve tehnikasına zarar ketire, keri alğan yerlerde pekitile», – dep aytıla Ukrayına Silâlı quvetleriniñ Baş ştabı malümatında.
Avdiyıvka ve Maryınka yönelişnlerinde Rusiye ordusınıñ ücüm areketleri muvafaqiyetsiz ola – 35 ücüm keri qaytarıldı.
«Şahterske ve Zaporijjâ yönelişlerinde imayecilerimiz Donetsk vilâyetiniñ Vodâne, Novoukrayınka, Staromayorske rayonlarında ve Zaporijjâ vilâyetiniñ Verbove rayonlarında duşmannıñ bütün ücümlerini keri qaytardı. Aynı vaqıtta, Ukrayına Mudafaa quvetleri Melitopol yönelişinde ücüm etmege, işğalci ordunıñ askerleri ve tehnikasına zarar ketirmege devam ete», – dep ayta Ukrayına arbiyleri.
Rusiyeniñ Ukrayınağa qarşı büyük istilâsınıñ altı yüzünci künü başlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
