Ukrayina Medeniyet ve haber siyaseti Nazirligi UNESCO Bütündünya mirası komitetiniñ kâtibiyeti ile "Hersones Tavriya qadimiy şeeri" tarihiy-arheologik abidesini Dünya mirası obyektleriniñ telükesi altında olğan cedveline kirsetmek içün muzakerelerni başladı.
Bu aqta "Suspilbe Qırım"ğa izaat berir eken MKİP Medeniy miras departamentiniñ Ukrayinanıñ işğal etilgen topraqlarında vaziyetni nezaret etüv meseleleri sektorınıñ müdiri Lina Doroşenko bildirdi.
"Nyu-Delide UNESCO Dünya mirası komitetiniñ 46-ncı toplaşuvında ukrayin eyyetiniñ reisi Anastasiya Bondar öz çıqışı vaqtında UNESCO dünya mirası obyektiniñ "Hersones Tavriya ve onıñ Hora" saqlanuv vaziyetini aydınlattı. Bundan soñ UNESCO Bütündünya mirası komitetiniñ kâtibiyeti ile bu obyektni Dünya mirası cedveline kirsetmek içün mümkün algoritmler aqqında muzakereler başlandı. Vaziyetniñ qıyınlığı - vaqtınca işğal etilgen topraqlar, monitoring missiyalarınıñ kirişi yoq. Amma, bunı başqa şekilde yapmağa imkân berecek protseduralar bar", — dep ayttı memur.
Doroşenko şunı da bildirdi ki, 2014 senesinden berli abide territoriyasında rusiyelilerniñ faaliyeti ilmiy ve ekspozitsion planda eñ istiqballi kompleksniñ qısımlarınıñ yoq etilmesine ketirdi.
Arheologiya İnstitutı ve Ukrayina Milliy ilimler akademiyasınıñ malümatına köre, Hersones territoriyasında Rusiye akimiyetiniñ 2014 senesinden başlap yapqan faaliyeti 80 215 kvadrat metrlik Hersones şeeriniñ yoq etilmesine ketirdi. İyülniñ 21-nde İAS tarafından derc etilgen esabatta, 4 biñ kvadrat metrge qadar diqqatqa lâyıq yerniñ maqsatsız qullanuvı sebebinden zarar ketirilgeni aqqında söz yürsetile, qalğan territoriya ise rusiyeliler tarafından "abadanlaştıruv" tedbirleriniñ menfiy tesiri sebebinden zarar ketirilgeni qayd etile.
Bu künleri Rusiye akimiyeti iyülniñ 30-nda tarihiy abide yerinde "Yañı Hersones" müzey-mabet kompleksiniñ açıluvını ilân etti.
Dünya mirası obyektleriniñ vaziyetini nezaret etken UNESCO ekspertleri daa 2019 senesi Hersonesteki abideniñ ayırılmaz bir parçası olğan binalarnıñ kilsege berilmesi sebebinden qasevetlengen edi. Qoruqnıñ bufer zonasında tarihiy-arheologik parknıñ qurulması aqqında UNESCO tefsirini tez vaqıtta elde etmege imkân olmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
