Ukrayina mahkemesi Qırım parlamentiniñ sabıq deputatını devlet hainligi içün 12 yılğa azatlıqtan marum etti, dep bildire Qırım Muhtar Cumhuriyeti prokuraturasınıñ matbuat hızmeti.
"Prokurorlar, 2014 senesi mahküm etilgenniñ Qırım parlamentiniñ diger deputatlarınen beraberlikte, Rusiye Silâlı quvetleri tarafından yarımada işğaliniñ qanuniyleştirilmesi içün bir sıra qanunsız qararlar qabul etilmesine rey bergenini isbatladılar", - dep aytıla haberde.
Qayd etilgenine köre, Ukrayina Yuqarı Radasınıñ muhtariyet parlamentiniñ vekilleriniñ vekâletleri toqtatılğan qararına zıt olaraq, figurant "Qırım mustaqilligi" ve "Qırım Cumhuriyetiniñ qanuniy varisligi" aqqında qararnı qabul etmek içün rey berdi.
Qanunsız rey berüv yarımada Rusiye Silâlı quvetleri tarafından işğal etilgenini gizlemek ve Rusiye Federatsiyasınıñ areketlerini qanuniyleştirmek maqsadınen keçirildi, dep aytıla haberde.
Beyanatta figurantnıñ adı ve soyadı aytılmay, amma medianen laf etmege aqqı olmağan ve adıni bildirmege istemegen memur Qırım.Aqiqatqa söz Nikolay Yureviç aqqında ketkenini bildirdi.
Ukraнina prezidentiniñ Qırım Muhtar Cumhuriyetindeki daimiy temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri - yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq". Onıñ aytqanına köre, insanlıqqa qarşı cinayetler ve arbiy cinayetler yapqanlar, insan aqlarını bozğanlar ve genotsid olaraq tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
