Ukrayina prezidentiniñ Qırımdaki daimiy temsilcisi Tamila Taşeva bildirdi ki, şimdi köpürni qurğan ve Keriç (Qırım) köprüni rekonstruktsiya etkenlerge qarşı sanktsiyalar üzerinde iş alıp barıla.
''Biz şimdi mahkemeciler, propagandistler, diniy erbaplar, Keriç köprüniñ bazı qısımları yoq etilgen soñ bile Keriç köprüni qurğan ya da rekonstruktsiya yapqanlar cedvelleri üzerinde çalışamız. Yani bularnıñ episi boyunca biz sanktsiyalar cedvelini azırlaymız", - dedi Taşeva.
Onıñ qayd etkenine köre, işbu meseleniñ koordinatsiyası ile Ukrayina iqtisadiyat nazirligi ve müessise yolbaşçısı Yuliya Sviridenko oğraşa.
"Milliy telükesizlik şurasınıñ qararlarını bekleymiz", - dep qoştı Taşeva.
2022 senesi oktâbr ayında Qırım (Keriç) köpründe patlav yüz berdi. 2023 senesi iyülniñ 17-nde Keriç köpründe daa bir patlav oldı.
2023 senesi oktâbr ayınıñ soñunda The Washington Post gazetası, ukrayin mahsus hızmetleriniñ gizli ameliyatları ve ABD mahsus hızmetlerinen işbirligine bağışlanğan materialında, ukrayin mahsus hızmetleri Keriç köprüne ücümlerniñ teşkilâtçıları olğanını yazdı. Ukrayina akimiyeti, bu operatsiyalarğa alâqası bar olğanını açıqtan-açıq, kimerde açıq aytmayıp bildire edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
