Ukrayına telükesizlik hızmetiniñ yolbaşçısı Vasıl Malük bildirgenine köre, oktâbr ayında Qırım (Keriç) köprüne ücümni kerçekleştirmek içün 21 tonna gekson qullanıldı. Onı Rusiye keçiş noqtalarında skanerler körmesin dep, paket plönkanen sarğan ekenler, dep bildire NV.
«Ceennemden keçip, rusiyelilerni qullandıq», – dep qayd etti Malük Ukrayına neşirine bergen intervyüsında.
Mahsus hızmet hadimleri keçiş noqtalarındaki skanerler patlayıcı maddeni körmesin dep, plönka qalınlığını keliştirip aldı.
Bundan ğayrı, Ukrayına telükesizlik hızmeti GPS-koordinatorlarnı bozğan mahsus bastırıcılarnı yeñip keçti.
2022 senesi oktâbrniñ 8-nde Keriç köpründe patlav oldı. Yük maşinası patladı, neticede yolnıñ bir qısmı yıqıldı ve yanıcı malzeme taşığan tren yanıp başladı. Dört kişi elâk oldı – patlağan yük maşinasınıñ aydavcısı ve yaqın keçken yengil maşinanıñ yolcuları. Rusiye Tahqiqat komiteti terakt aqqında cinaiy dava açtı.
Rusiye akimiyeti patlav teşkilâtçıları Ukrayına mahsus hızmetleri ola, dep ayttı. Kyiv patlavğa alâqası olğanını inkâr etken edi. Mayısta ise Ukrayına telükesizlik hızmetiniñ yolbaşçısı Vasıl Malük mahsus hızmet bu logistik yolnı kesmek içün çalıştı, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
