Rusiye Ukrayınağa qarşı cenkte yañı ücüm yapmağa planlaştıra. Bu aqta Ukrayına Mudafaa nazirliginiñ Baş istihbarat idaresiniñ vekili Andriy Çernâk bildirdi, dep haber ete «RBK Ukrayına».
Aynı vaqıtta, onıñ aytqanına köre, Rusiye ordusı «iç bir yönelişte» maqsadına irişemedi.
«Olar yutturacağını añlay, amma cenkni bitirmege istemey. Şimal ya da şarqtan aynı vaqıtta ücüm ete bileceklerini tüşünemiz. Duşmannıñ böyle areketleri tahmin etile ve ordumız buña azır», – dep ayttı istihbarat temsilcisi.
Çernâk, Rusiye ordusı Qırımğa qara koridornı saqlap qalmağa ve Donetsk vilâyetini bütünley zapt etmege tırışacaq, dep emin.
«Ukrayına arbiy istihbaratınıñ malümatına köre, kelecek 4-5 ayda Rusiye ordusı daa 70 biñ insannı coya bile. İşğalci memleketniñ reberligi bu ğayıplarğa azır», – dep qoştı o.
Ukrayına Silâlı quvetleriniñ Baş ştab malümatına köre, Rusiye ordusı Donetsk vilâyetiniñ memuriy sıñırına çıquv niyetlerinden vazgeçmey.
Britaniyanıñ istihbaratı ise Rusiyeniñ Donetsk vilâyetindeki Bahmutqa qarşı ücümleri soñki künlerde eksildi, dep tüşüne. «Yaqın aftalarda Rusiye pek ilerilemeycektir», – dep qayd etti o.
Cenkni tedqiq etüv institutınıñ ekspertleri de Rusiye arbiyleri cebeniñ bazı yerlerinde aynı seviyede areket etip olamağanını tüşüne – top silâsınıñ yedekleri bite.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
