Ukrayına arbiyleri 2023 senesi işğal etilgen Qırımda ve Qara deñizde bir qaç arbiy ve mahsus operatsiya keçirdi, dep bildirdi Ukrayına Mudafaa nazirliginiñ Baş istihbarat idaresiniñ vekili Andriy Çernâk «Biz – Ukrayınamız» telekanalına.
Onıñ aytqanına köre, yarımada yalısında silâlı reydler ve istihbaratçılarnıñ diger Qara deñiz seferleri – Ukrayına ordusına ait plannıñ bir parçasıdır.
«Qayd eteyim – böyle mahsus operatsiyalar yer-yer yapıla, amma ayrı degil: episi bir plannıñ parçası ola, daa keniş tedbirlerniñ keçirilüvine kire», – dep qayd etti Baş istihbarat idaresiniñ temsilcisi.
Çernâk bu daa başlanğıçı ola dep, 2024 senesi böyle tedbirler daa çoq olacaq, dep ayttı.
Bundan ğayrı, Baş istihbarat idaresi Rusiye arbiyleriniñ bütün logistik yollarınen, hususan Qırım köprünen bağlı malümatnı taqip ete ve Mudafaa quvetlerine yetkize, dep qayd etti. Olarnı birinciden silâ, yanıcı qarışma ketirilmesin ve Rusiye ordusınıñ Ukrayına silâlı quvetlerine köstergen tesirini eksiltmek içün yoq etmege tırışalar.
Aqşam üstü yerli saifeler Qırımdaki patlavlar aqqında bildirdi. «Krımskiy veter» Telegram kanalı Kezlev rayonında 10 patlav aqqında yazdı. Saq rayonında da patlavlar aqqında haber etilgen edi.
Cuma künü Aqyarda ava telükesi üç kere ilân etilgen edi. Rusiye Mudafaa nazirligi yarımadada 4 raketa «yoq etildi», dep bildirdi.
Ukrayına Ava quvetleriniñ komandanı Mıkola Oleşçuk Saqtaki uçaq alanında Rusiye arbiyleriniñ idare noqtası yoq etildi, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
