İşğal etilgen Aqyarda Ukrayına istihbaratı elektrik ast stantsiyasını patlattı, dep haber ete «Ukrayınska pravda» müessisedeki menbağa esaslanıp.
«Gruppa o yerde çalıştı. Elektrik ast stantsiyası çalışmaycaq alğa ketirildi», – dep bildirdi neşirniñ subetdeşi.
Yerli telegram kanalları bildirgenine köre, gece Gagarin rayonınıñ bir qısmı elektriksiz qaldı. Berilgen malümatqa köre, Vakulençuk soqağı civarında elektrikler kesilmezden evel patlavlarğa oşağan sesler eşitilgen edi.
Şeerniñ Rusiye yolbaşçısı Mihail Razvojayev elektrik kesilüviniñ sebebi rayon ast stantsiyasında tehnologik bozuluv ola, dep bildire.
Muarririyet taraflarnıñ malümatını tasdıqlap olamay.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
