Ukrayina istihbaratınıñ vekili Andriy Yusov Qırımğa yanvarniñ 4-nde ücüm etilgenini izaatladı. Onıñ aytqanına köre, yarımadada arbiylerniñ işi devam etecek.
''Tedqiqat ve malümat toplanılğanda ve imkânı olğanda, bu malümat bildirilmek kerek. Qayd etmek mümkün ki, nişanlarnıñ bir qısmı yoq etildi ve ukrayin qoruyıcılarınıñ işi devam etecek", - dep bildire Yusovnıñ sözlerini "Suspilne" neşri.
Bundan evel «Cenüp» operativ komandanlığınıñ spikeri Natalâ Ğumenük, ukrayin arbiyleri yanvarniñ 4-nde Rusiye Federatsiyasınıñ komandanlıq noqtasına ücüm etip, yarımadanıñ mudafaa sistemasına zarar ketirgenini bildirgen edi.
Cumaaqşamı künü Qırım.Aqiqat mühbiri bildirdi ki, Aqyarda ava telükesi ilân etilgen soñ 10-ğa yaqın patlav eşitildi. Şeerniñ rusiyeli başı Mihail Razvojayev, "bir qaç ava nişanı urulğanını" bildirdi.
Rusiye Mudafaa nazirligi öz beyanatında Qırım üzerinde 10 raketanıñ yoq etilgeni aqqında bildirdi. Rusiye müessisesi, bular avadan idare etilgen raketalar olğanını iddia ete ve ücümde Ukrayinanı qabaatlay.
Rusiye Mudafaa nazirligi yanvarniñ 4-nde Qırım üzerinde yapılğan ekinci ava ücüminde 36 uçucısız uçaqnı yoq etkenini de iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
