Ukrayina Baş istihbarat idaresi ilhaq etilgen Qırım territoriyasında Rusiye tarafından qanunsız şekilde alınğan 110 medeniy qıymetli eşya aqqında malümatnı derc etti. Malümat War&Sanctions portalında "Hırsızlanğan miras" bölüginde yerleştirilgen.
Söz 2014-2025 seneleri yapılğan arheologik qazmalarda tapılğan şeyler aqqındadır: “Artezian mesken yeri”, “Çembalo Ceneviz qalesi” ve Tavrik Hersonesiniñ Cenübiy civarı.
"Aqyarnıñ işğal akimiyeti ticaret merkezini qurmaqnı planlaştırğan Kadıkovskoye (Roma lageri) şeerçigi territoriyasındaki qıymetli eşyalar ve tecavuzcı tarafından Yekaterinburgdaki tarihiy müzeyde muvaqqat sergi altında "Tavrik Hersones" milliy qoruğından çıqarılğan eksponatlar aqqında malümat da derc etildi", — dep yazıla beyanatta.
Kiçik ayda Ukrayina prezidenti Volodımır Zelenskıy, Qırımdaki Ukrayina medeniy mirasınıñ hırsızlanmasında iştirak etken Rusiye erbapları ve institutlarına qarşı sanktsiyalar tayin etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
