Ukrayina Mudafaa nazirliginiñ Baş istihbarat idaresi, noyabrniñ 28-nde işğal etilgen Qırımda "Podlöt" Rusiye radar kompleksi yoq etilgenini bildire.
Yarımadanıñ ğarbındaki Kotovskoye mesken yeriniñ civarında sistema zarar kördi, dep bildire müessise.
"Podlöt" 48Я6-К1 mobil RLS duşman tarafından qıyın mania vaziyetinde az ve az yüksekliklerde ava maqsadlarını tapmaq içün qullanıla. "S-300 ve S-400 ZRK içün maqsat talimatlarını bermek içün qullanılğan duşman radar kompleksiniñ tahminiy fiyatı 5 million dollarnı teşkil ete", — dep qayd ettiler istihbaratta.
Qırım.Aqiqat bu malümatnı mustaqil menbalardan şimdilik teşkerip olamay.
Rusiye arbiyleri böyle kompleksniñ yoq etilüvi aqqında haber etmey. Rusiye Mudafaa nazirligi noyabrniñ 28-nde saba Qırımğa üç uçucısız uçaq ücüm etkenini bildirdi. Bunen beraber, zarar körgenler aqqında haber etilmey ve uçaqlarnı urıp tüşürgenler, dep aytıla.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı "Ukrayina uçucısızlarına" qarşı ateş ve "ava mudafaa sistemasınıñ işi" dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün "esas telüke" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
