Ukrayina Mudafaa nazirliginiñ Baş istihbarat idaresi işğal etilgen Qırımda çalışacaq bölüklerge göñüllilerni celp etkenini ilân etti. Bu aqta müessiseniñ telegram kanalında aytıla.
''Dağlarda yıldırımnıñ sesi hoşuna kelemi? Qırım dağlarında onı soñki sefer ne vaqıt eşitken ediñ? Belki de, bizge qoşulmağa vaqıt keldi? Ukrayina Mudafaa nazirliginiñ GUR faal areket bölüklerine qoşulıñız ve duşmanlarıñızğa, qayda ya da nasıl gizlengen olsalar da, kerçek bir gürültü yapmağa imkânıñız olur'', - dep aytıla haberde.
Müessisede qayd ettiler ki, muvafıq bölükler ukrayin istihbaratınıñ "eñ cesür planlarını" ömürge keçire. "Olar - Vatanımızğa qarşı yamanlıq yapmağa niyetlengenlerni er yerde alacaq cezalandıruv qılıcıdır!" - dep aytıla beyanatta.
Daa evel Ukrayina Mudafaa nazirliginiñ Baş istihbarat idaresiniñ yolbaşçısı FT intervyüsında ilhaq etilgen Qırım territoriyasında mahsus operatsiyalar devam etecek, dep bildirdi. Kırılo Budanovnıñ qayd etkenine köre, missiyalarnıñ esas vazifelerinden biri - Qırımdaki RF Silâlı quvetleriniñ logistikasını yoq etmektir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
