Ukrayina Mudafaa Nazirliginiñ Baş istihbarat idaresi Rusiye ordusı tarafından zapt etilgen Energodar ve onıñ civarındaki topraqlarnıñ sakinlerini Rusiye arbiyleriniñ bulunğan noqtaları ve yaşağan yerleri aqqında malümat toplap, bildirmege çağıra.
Bundan ğayrı Ukrayina istihbaratı RF ordusına reberlik etkenlerniñ yaşağan yerleri, arbiy tehnikanıñ areket yolları, yerli kollaborantlar aqqında malümatnı da bildirmege çağıra.
"Hususan Rosatomnıñ hadimlerine, Rusiyeden yollanılğan diger mütehassıslarğa diqqat etmege çağıramız. Olarnıñ vazifelerini, adını ve soyadını, yaşağan ve çalışqan adreslerini, telefon nomerlerini, arabalarınıñ nomerlerini bildiriñiz. İşğalcilerni toprağımızdan beraber quvayıq! Ukrayinağa şan-şerefler! Alâqa nomeri: +380963101126", - dep yazıla bildirmede.
Martnıñ 4-nde Zaporijjâ Atom elektrik stantsiyası Rusiyeniñ işğali altındadır.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
