Bugün, oktâbrniñ 1-nde, Ukrayinada İmayeciler künü qayd etile.
Ukrayina Silâlı Quvetleriniñ Baş Komandanı Oleksandr Sırskıy öz muracaatında bütün dünya şübhelengenine baqmadan, «dünyanıñ ekinci ordusı» dep adlandırılğan orduğa cenk bergenlerniñ ve onı toqtatqanlarnıñ bayramı ola, dep ayttı.
«İnanğanlarnıñ bayramıdır. O, bu dünyada yahşılıq yamanlıqnı, yarıq ise qaranlıqnı yeñgenine inanğanlarnıñ... Ukrayina oğrunda cenklerde elâk olğan qaramanlarımızğa ebediy şan-şüretler olsun. Bizim Ukrayina Ğalebemizni paradnen keçireceklerniñ bayramıdır», – dep yazdı o, Telegram kanalında.
Sırskiy, oğul ve qızlarını Vatannı qorçalamaq içün ayaqqa turğan vatanperverler olaraq terbiyelegen ana-babalarğa teşekkürler bildirdi. O, «ğalipler, Ukrayina imayecileri ordusına» qoşulmağa da çağırdı.
Memleketniñ Mudafaa naziri Rustem Umerov er bir Ukrayina askerine birlik, cesaret ve ğayret içün minnetdarlıq bildirdi.
«Biz ne içün küreşkenimizni bilemiz: evimiz içün, tınç kökni arzu etken soy-soplarımız içün. Qurtulışnı beklegen şeer ve köyler içün. Yer yüzünde qorqmayıp yaşaycaq kelecek nesiller içün. Ve asırlar devamında canlarını serbestligimiz içün feda etkenlerniñ hatırasına. Devletimiz içün canlarını feda etken Ukrayina oğul ve qızlarına ebediy ürmet», – dep aytıla muracaatında.
Evel Ukrayina İmayecileri künü oktâbrniñ 14-nde qayd etile edi – çünki Yulian taqvimine köre, bu künde Muqaddes Meryemniñ Şefaatı qayd etile edi. Ukrayina ananesinde o, duşmanlardan qorçalanuv ğayesinen sıqı bağlıdır: ukrayin kazakları Meryemni öz şefaatçısı dep saya ediler, bu bayram diniy taqvimde eñ müimi edi.
2023 senesi Ukrayina pravoslav kilsesi ve Ukrayina yunan-katolik kilsesi yulian taqvimi yerine Yañı yulian taqvimine keçtiler. Bu sebepten kilse bayramlarınıñ çoqusı 13 kün artqa avuştırıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
