Ukrayina Mudafaa nazirliginiñ Baş istihbarat idaresiniñ temsilcisi Andriy Yusov arbiy deñiz flotunıñ iştiragi ile Qırımda mahsus ameliyatnıñ keçirilmesi aqqında malümatnı tasdıqladı.
"Baş istihbarat idaresi arbiy-deñiz flotunıñ iştiragi ile mahsus ameliyatnı keçirdiler, maqsat irişilgen, arbiylerimiz arasında ğayıplar yoq. Mahsus ameliyat devam ete, tafsilâtnı bildirip olamaymız, duşmannıñ arbiyleri, quvetleri ve tehnikası arasında ğayıplar bar", - dep bildirdi Yusov.
Evel Ukrayina istitihbaratındaki menbalar Qırım.Aqiqatqa Tarhankunt burnundaki Mayak qasabasında gemilerniñ ve aviatsiyanıñ iştiragi ile uruş yüz bergenini bildirgen edi.
Tarhankut barnu civarında atış aqqında SHOT Rusiye telagram kanalı haber etken edi.
Rusiye akimiyeti ve Qırımdaki RF arbiyleri vaziyetni şimdilik daa izaatlamadılar.
Avgustnıñ 23-nde Ukrayina Mudafaa nazirliginiñ Baş istihbarat idaresiniñ reberi Kırılo Budanov işğal etilgen qırımda S-400 "Triumf" Rusiye zenit-raketa kompleksiniñ yoq etilmesi aqqında haber etti. Berilgen malümatqa köre, saat 10-larda Olenivka köyü yaqınlarında Tarhankut burnunda patlav yüz bergen. Onıñ neticesinde S-400 "Triumf" Rusiye zenit-raketa kompleksi, raketalar ve arbiyler yoq etilgen. Rusiye tarafı bu bildirüvni izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
