"Qırım köprü mıtlaq viran etilecek, bu tek zaman meselesidir", - dedi Ukrayina İç işler naziriniñ mesleatçısı Viktor Andrusiv. Onıñ sözlerine köre, bu vazifeni eda etmek içün Ukrayina ordusında kerekli silâ bar, amma arbiylerge "Azaq deñiziniñ sailine ziyade yaqınlaşmaq" kerek.
"Vot tak" neşri qayd ete ki, bir qaç kün evel interenette Keriç boğazı üzerinden köprüniñ viran etilmesine qadar kerige sayğan saat peyda olğan. Güya bu mayısnıñ 9-nda olmaq kerek.
Bundan evel Letoniya Silâlı quvetleriniñ temsilcisi Yanis Slaydinş de Ukrayina arbiyleriniñ tam bu künde Keriç köprüne darbe endire bilecegini tahmin etti. O, keçitni "pek müim strategik obyekt" adlandırdı ve "onıñ bozulması Rusiyege ciddiy darbe olacaq, çünki bütün cenübiy yöneliş içün silâlar köpürden teslim etile".
Rusiye Keriç köprüni arbiy tehnikanı Rusiyeden Qırımğa ve keri taşımaq içün qullana.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
