İşğal altındaki topraqlarda Ukrayına gençleri çağına yetmezden evel Rusiye arbiy komissarlıqlarına malümat bermeli, dep bildirdi Yuqarı Radanıñ insan aqları vekâletlisi Dmıtro Lubinets.
Onıñ aytqanına köre, Ombudsmen ofisinde 18 yaşını toldurğan ukrayınalı birden seferber etilgenine dair resmiy bir malümat yoq.
Amma işğalde olğan ya da Rusiyege çıqarılğan ukrayınalı gençler askerlikke alınacaqlarnıñ cedvellerin kirsetile, dep ayta Lubinets.
«18 yaşını toldurmağan ukrayınalı oğlanlar Rusiyede ya da vaqtınca işğal etilgen Ukrayına topraqlarında arbiy komissarlıqlarğa malümat bermeli. Olarnı askerlikke alınacaqlarnıñ cedveline kirseteler. Bizim fikirimizce, ukrayınalı balalarnıñ seferberligi içün azırlıq yapıla», – dedi Lubinets.
Ombudsmen Rusiyede bulunğan ukrayınalı balalar «Rusiye bala, gençlik teşkilâtlarınıñ azaları olmalı», dep tarif etti.
«Episi arbiy yönelişli. Tek oğlanlar degil, qızlar da böyle teşkilâtlarnıñ azaları olmağa mecbur. Episi Kalaşnikov avtomatını bozmağa, sırada yürmege, Rusiye yırlarını yırlamağa bilmeli. Ve olarğa añlatılğan esas şey, ileride Rusiye arbiyleri olmağa mecbursıñız», – dedi insan aqları vekâletlisi.
Baş nazir muavini, vaqtınca işğal etilgen topraqlarnıñ reintegratsiya meseleleri naziri İrına Vereşçuk bildirgenine köre, büyük cenk başlağanda Ukrayınağa Rusiye Federatsiyasına qanunsız bir şekilde çıqarılğan eñ az 380 bala qaytarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
