Ukrayina elçiligi yolğa tökülgen ukrayin aşlığı ile bağlı vaqiağa cevap berdi ve qabaatlılarnı cezalandırmağa talap ete, dep yazdı Poloniyadaki Ukrayina elçisi Vasiliy Zvarıç Facebookta.
''Biz qabaatlılarnı tapıp, mesüliyetke çekmege talap etemiz. Poloniya akimiyet organları, ukrayinler ve poloniyalılar içün ayıp ve aqaretleyici bu cinayetke uquqiy alanda kesen-kes cevap berip, kelecekte böyle varvar areketlerge yol bermemek kerekler", - dep qayd etti o.
Diplomatnıñ aytqanına köre, bu aşlıq, gümrük protseduralarından soñ tamğalanıp, Litvaniyağa tranzitnen ketken ukrayin tirlerinden çıqarılğan edi. Zvarıç qayd etti ki, "Ukrayina diplomatları yük maşnalarınıñ aydavcılarınen doğrudan bağda bulunalar".
Elçi hatırlattı ki, poloniyalı çiftçiler tarafından aşlıq tökülgeni aqqında malümat alınğan soñ, Ukrayinanıñ Lüblinde elçiligi ve baş konsullığı acele Poloniya politsiyasına muracaat etip, bu vaqia boyunca dava açmağa talap etti.
Helm politsiyasınıñ malümatına köre, Doroguskte keçit noqtasından uzaq olmağan yerde narazılıq bildirgen çiftçiler üç ukrayin yük maşnasını toqtattı ve olardan aşlıqnı yolğa töktiler. Bu vaqia boyunca Poloniya politsiyası tahqiqat başlattı.
Fevralniñ 9-nda Poloniyada "Birdemlik" zenaat birligi tarafından ilân etilgen çiftçilerniñ narazılığı başlandı.
Ukrayinadan köy hocalığı mahsulatınıñ ketirilmesini yasaq etüvden ğayrı, poloniyalı miting iştirakçileri Avropa agrar siyasetine qarşı çıqalar, şu cümleden "Yeşil tertip"niñ kirsetilmesine qarşı çıqalar. Em de talapları arasında ayvancılıqqa qol tutuv da bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
