Bu aqta «Azatlıq Radiosına» Ukrayina telükesizlik hızmetindeki menbası bildirdi.
Menbanıñ malümatına köre, anbarda «İskander» operativ-taktik raketa sistemaları, «Toçka-U» taktik raketa sistemaları, idare etilgen bombalar ve top cenk silâları saqlanğan edi, dronlar «anbarnı yer yüzünden sildi».
Bundan evel Rusiyeniñ Tver vilâyetiniñ Toropets şeerinde dronnıñ ücümi sebebinden yanğın çıqqan, dep bildirdiler. Akimiyet yanğın söndürüv işleri devam etken yerden halqnı tahliye etüv aqqında ilân etti.
«Astra» telegramm kanalı yerli sakinlerge esaslanıp, cenk silâ anbarına ücüm etildi, dep bildirdi. Haberge köre, Toropetste Rusiye Silâlı quvetleriniñ arbiy bölügi yerleşken ve bundan evel eñ azından eki kere dronlar ücümine oğrağan edi.
Sentâbrniñ 18-de Rusiyeniñ Mudafaa nazirligi bir qaaç regionda 54 dronnıñ yoq etilgeni aqqında haber etti. Lâkin anda Tver vilâyetindeki vaziyet aqqında haber berilmedi. Rusiye akimiyetiniñ beyanatları mustaqil menbalarda tasdıqlanmalı.
Rusiyeniñ Ukrayinağa qarşı büyük ücümi başlanğanından berli Rusiyeniñ regionlarına daima arbiy dronlar uçıp, yıqıluv ve qurbanlarğa sebep ola. Rusiyeniñ Mudafaa nazirligi ücümler Ukrayina tarafından yapılğanını bildire.
Kyiv Rusiyege qarşı ücümler Moskvanıñ cenk ğayretiniñ anahtarında olğan arbiy, energetik ve naqliye infrastrukturasına yönelgenini bildirdi.
Rusiye akimiyeti Ukrayina darbelerinden kelgen zararnıñ episi aqqında bir vaqıt haber etmey.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
