Rusiye ordusı Ukrayinağa gece 141 uçucısız uçurdı, dep haber ete noyabrniñ 18-nde Ava küçleriniñ komandanlığı.
Onıñ malümatına köre, 73-ü reaktiv olğan çeşit dronlar Orel, Millerovodan ve işğal etilgen Qırımnıñ Çavda burnundan ve Sarabuzdan uçurıldı.
"İlk malümatqa köre, saat 08:00-ge qadar ava mudafaası Shahed (59-ı reaktiv edi), "Gerber", diger dronlar olğan 126 duşman uçucısızını urdı/bastırdı", – dep aytıla haberde.
Ukrayina arbiyleri yedi yerde ava ücüm vastalarınıñ darbesini qayd etti. Olar bir qaç darbe uçucısızı alâ daa avada qala, iş devam ete, dep tenbiley.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.