Ukrayina ve Rusiye "eñ yaqın vaqıtta" cenk esirlerini deñişecek, dep bildirdi Ukrayina prezidenti Volodımır Zelenskıy.
"Eyyetimizniñ bugünki körüşüvlerden soñ maruzası oldı – üç taraflı format oldı… Bu künde muzakerelerniñ ara neticelerini muzakere ettik. Yarın devam etecekler. Müim bir adım daa olacaq: eñ yaqın vaqıtta cenk esirleriniñ deñişüvii olacaq. Esirlerni evge qaytarmaq kerek", – dedi o, video muracaatında.
Zelenskıynıñ qayd etkenine köre, Ukrayinanıñ qararı tam – "cenk kerçekten toqtatılmalı".
"Rusiye bunı azır olmaq kerek. Ve ortaqlar bunı kerçek kefaletlernen temin etmege azır olmalı – telükesizlik kefaletlerinen – istilâcığa qarşı basqınen. Ve şimdi is etileceklernen – Ukrayinadaki insanlar bunı is etsin – rusiyeliler özüne fayda ketirmek içün ve darbe endirmek içün degil de, vaziyet kerçekten barışıqqa kete, cenk bitmesine ketkenini añlamalı", – dedi Ukrayina prezidenti, istilâcığa mukâfatlar olmamalı, dep qoştı.
Tünevin Abu-Dabide (BAE) üç taraflı muzakerelerniñ daa bir raundı oldı, Ukrayina tarafı "mündericeli ve semereli" iş aqqında bildirdi.
Rusiyeniñ Ukrayinağa qarşı kütleviy darbesinden soñ Ukrayina prezidenti Volodımır Zelenskıy fevralniñ 3-nde "muzakere taqımınıñ işi keregi kibi tüzetilecek", dep bildirdi.
Kremlniñ matbuat kâtibi Dmitriy Peskov fevralniñ 4-nde saba jurnalistlerge Rusiyeniñ muzakerelernen bağlı qararı deñişmey, ve "em Kyivke, em Amerika muzakerecilerine tam belli", dep ayttı.
Yanvarniñ 23-nde ve 24-nde cenk başlağanından berli ilk sefer Abu-Dabide ABD, Rusiye ve Ukrayina eyyetleriniñ cenkni bitirmek içün üç taraflı muzakereleri olıp keçti.
Muzakerelerniñ nevbetteki raundı fevralniñ 1-nde ola bile, dep yazdı Axios neşiri adı aytılmağan Amerika memurınıñ malümatına esaslanıp. Neşir subetdeşlerinden biri taraflar Rusiye ve Ukrayina prezidentleriniñ körüşüv imkânını ve "Putin ve Zelenskıy körüşüvine pek yaqın olğanlarını muzakere ettiler, dep bildirdi.
Nevbetteki basamağı fevralniñ 1-nde keçirilecek edi, amma soñra Ukrayina, ABD ve Rusiye arasında üç taraflı körüşüv fevralniñ 4-nde ve 5-nde olacaq, dep belli oldı.
Yanvarniñ 28-nde ABD devlet kâtibi Marco Rubio topraq meselesi çezilmey, dep ayttı. Rusiye Ukrayina Silâlı quvetlerinden zapt etmegen Donetsk vilâyetiniñ o qısmından ordusınıñ çıqarılmasını talap ete.
Yanvarniñ 25-nde Ukrayina prezidenti Volodımır Zelenskıy Vilnüs ziyareti vaqtında Kyivniñ topraq qararı deñişmey, uzlaşuvlarğa ise bütün taraflar azır olmalı, dep ayttı. O, ABD ile eki taraflı telükesizlik kefaletleri "100%" azır ve Kyiv imzalanmasını bekley, dep qayd etti.
Zelenskıy dekabr ayında topraq qararları meselesini Ukrayina halqı "saylavlar ya da referendum formatında" çezmeli, dep bildirdi.
Aynı vaqıtta Kreml Ukrayina içün ğarbiy telükesizlik kefaletlerini red etmege devam ete ve cenkte maksimalist maqsadları olğanını köstere, dep qayd etken edi ISW talilcileri.