Ukrayina, Rusiyeniñ ücümleri ve suvuq ava sebebinden energetikadaki qıyın vaziyet şaraitinde energetik "Ramştayn" toplaşuvını çağıra. Bu aqta tış işler naziri Andriy Sıbiğa bildirdi.
"Baş nazir Yuliya Sviridenkonıñ avalesinen Energetika nazirligi ile beraber Energetik Ramştaynnı toplaymız, mında ittifaqdaşlardan qoşma para ve konkret mecburiyetlerni alacağımıznı bekleymiz. Avropa energetika toplulığı ile Ukrayina energetikasına qol tutuv Fondunı toldurmaq ve fond esasında donatmalarnı satın almaq içün daimiy alâqada bulunamız", — dep yazdı o Facebookta.
Onıñ aytqanına köre, İtaliya eñ çoq zarar körgen cemaatlarğa yardım etmek içün 1,85 million yevro miqdarında yüksek küçlü (550-den 3000 KW-ge qadar) sanayı boylerlerni ketirmege başladı.
Sıbiğanıñ bildirgenine köre, bu afta gaz ve donatmalarnıñ satın alınması içün Norveçten 200 million dollarlıq büyük yardım paketi keldi.
Sıbiğa şunı da bildirdi ki, yarın ava mudafaası qabiliyetleriniñ qoşma destek paketleri aqqında yañı ilânlar olmaq kerek.
2022 senesi kiçik aydan başlap Rusiye Ukrayinanıñ energetik infrastrukturasına ücüm ete. 2025 senesi küzniñ başından Rusiye ordusı Ukrayin energetikasına ateş açmağa başladı.
