Ukrayına Rusiye prezidenti Vladimir Putinniñ Beyazrusiyede Rusiye özek silâsını yerleştirgenine dair beyanatı sebebinden BM Telükesizlik toplaşuvını acele toplamğa talap etti. Bu aqta Ukrayına Tış işler nazirliginiñ beyanatında aytıla. Kyiv Telükesizlik şurasınıñ daimiy azaları – Frenkistan, Büyük Britaniya, ABD ve Qıtaydan qararlı adımlar bekley.
Rusiye de bu teşkilâtnıñ daimiy azası ola ve anda veto aqqı bar.
Rusiyeniñ Beyazrusiyede taktik özek silâsını yerleştirmek niyetleri «daa bir provokatsion adım» olaraq adlandırıla. Ukrayına Tış işler nazirligi Beyazrusiye cemiyetine muracaat etip, «cinaiy niyetlerni yerine ketirmege imkân bermemege» çağırdı.
Martnıñ 25-nde Vladimir Putin Rusiye Beyazrusiyede taktik özek silâsını yerleştirecek, dep bildirdi – iyülniñ 1-ne qadar mahsus anbar qurucılığı yekünlenmeli. Bundan ğayrı, Minskke «İskander» raketa kompleksi ve özek raketalarını taşığan uçaqlar berildi.
Putinniñ aytqanlarına köre, qarar Büyük Britaniya Ukrayınağa işlengen uran snarâdlarını bermege niyeti bar dep bildirgen soñ alındı. Bular özek silâsı olmay. Lâkin Moskva niyetlerge sert bir şekilde cevap berip, Londonnı kerginlikte qabaatladı ve cevap tedbirleri aqqında vade etti.
Ukrayına Milliy telükesizlik ve mudafaa şurasınıñ kâtibi Oleksiy Danılov Putinniñ Beyazrusiyede taktik özek silâsını yerleştirecegine dair laflarını bu memleketniñ iç kerginleştirilüvine bir adım olaraq tasvirley. Onıñ fikirince, o, Beyazrusiye cemiyetinde Rusiye ve Putinge menfiy baquv seviyesini bayağı arttıra. «Kreml Beyazrusiyeni özek reineleri arasına aldı», – dep ayttı Danılov. Ukrayına prezidenti ofisiniñ mesleatçısı Mıhaylo Podolâk Putinniñ qararını Moskvada Ukrayınağa qarşı cenkni yutquzğanını añlağanlarınıñ bir işareti dep saya.
ABD akimiyeti Rusiye prezidenti Vladimir Putin Rusiye Beyazrusiyede taktik özek silâsını yerleştirecek dep aytqan soñ strategik özek küçleriniñ işini nizamını deñiştirmeycek, dep bildirdi.
Almaniya Tış işler nazirligi Kreml yolbaşçısınıñ qararını Rusiye tarafından «qorquzuv ıntıluvı» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
