Ukrayinada mart ayında vatandaş ealisi arasında qurbanlarnıñ sayısı arttı, dep aytıla Ukrayinadaki BM insan aqları Monitoring missiyasınıñ er aylıq malümatında.
Teşkilât qayd etkenine köre, mart ayında eñ az 164 ölü ve 910 yaralı qayd etildi – bu 2025 senesi fevral ayına köre 50% çoq (129 ölü ve 588 yaralı) ve keçken sene aynı müddetke köre 70% çoq (2024 senesi mart ayında 129 ölü, 498 yaralı).
Teşkilâtnıñ malümatına köre, vatandaşlar arasında qurbanlarnıñ 95%-ı Ukrayina ükümeti kontrolindeki topraqta oldı. Çoqusı qurban büyük mesafe raketa ve yürgen cenk silâlarından oldı.
«Ukrayinada vatandaş ealisi arasında qurbanlar sayısı bayağı arttı, em de mart ayında fevral ve keçken seneniñ aynı müddetine köre bu raqam daa yüksek edi», – dep qayd etti Daniel Bell, teşkilâtnıñ reisi.
Teşkilât qayd etkenine köre, Krıvıy Riğ – mart ayında eñ çoq zarar körgen şeerlerden biri, cebeden 60-70 kilometrde buluna. Rusiye Silâlı quvetleriniñ beş ücümi neticesinde şeerde eñ az 6 barışıqsever sakin elâk oldı ve 66 kişi yaralandı. Ücüm obyektleri arasında vatandaş binaları bar, şu cümleden eki ötel ve restoran.
Krıvıy Riğde ölümlerge yol açqan ücümler aprelde de devam etti. Aprelniñ 4-nde ballistik raketanıñ bala meydançığındaki patlavı neticesinde 20 barışıqsever sakin, şu cümleden doquz bala elâk oldı. Daa 74 insan yaralandı, olarnıñ arasında 12 bala bar. Bu ücüm bir darbe neticesinde elâk olğan balalarnıñ sayısına köre eñ büyük oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
